Blogg WEB 2.0

Dát čálus lea geatnegahtton čálus OP2 fágas, barggu hámi oažžu studeantta ieš válljet galgá go leat blogga hámis, podcast hámis, dábálaš word hámis. Mun lean válljen čállit dán čállosa dahje logga blogga hámis. Čálus galgá leat 1-2 siidosaš čálus, gos mun válddán web 2.0 logaldallama ovdan.

Go mun vuosttaš geardde gullen web 2.0 fátta, ja go vuosttaš geardde oidnen ahte OP2 studeanttain galggai leat juste dan fáttá birra logaldallan de mus čuožžiledje hui alla vuordámušat dasa. Go mun dihten ahte web 2.0 mearkkaša juoga interneahtas ja dihtoriin bargat. Go JAO jearai studeanttain makkár vuordámušat mis leat su logaldallamii de mun vástidin ahte vuorddán logaldalli galgá munnje čilget ollislaččat mii web 2.0 lea ja movt dat galgá geavahuvvot skuvlla ja oahpaheami oktavuođas.

Mii lea web 2.0? Lea oalle váttis čilget oanehaččat mii web 2.0 lea, muhto mun geahččalan čilget dan ja áiggun logaldallamiid mielde ja iežan ipmárdusa mielde čilget. Web 2.0 lea ođđa teknologiija dahje portála gosa leat čohkkejuvvon iešguđetlágan vejolašvuođat, dego vejolašvuođat gulahallat, dieđuid juohkit ja gávdnat, sosiala fierpmádagat, dieđuid neahtas ohcan vejolašvuođat, vurken vejolašvuođat, govva-teaksta-jietna reaiddut, jna. JAO logaldallamis boahtá okta govva gos dát čájeha visuálalaččat mii web 2.0 lea. Lean válljen váldit dan gova mielde čájehan dihte dan.

Masa lea ávkin dát? JAO muitala ahte son atná dán teknologiijan ávkin sihke barggu oktavuođas ja priváhta oktavuođas. Skuvllas dahje barggus son geavaha dáid reaidduid ja vejolašvuođaid
Dákkár resurssa čoakkáldat lea hui ávkalaš oahpaheddjiide geat galget ráhkadit neahttaoahpahusa dahje oahpaheddjiide geat galget čađahit gáiddusoahpahusa. Dat lea dego uksa, go dan rabestat, de gávnnat buot máid dárbbahat ja máid it dárbbaš veahkeneavvun iežat neahtta oahpahus ovdánahttimis (JAO muitalii movt galgá garvit daid veahkeneavvuid maid ii dárbbaš). Michael Wesch muitala su youtube filmmas “portal to media literacy” ahte son lea bartidan dábálaš klássa lanja oahpahan vugiin, son lea vuohttán ahte eatnasat eai liiko dan vuogi muhto aŋkke leat oahppoáŋgirat. Mun dieđan ahte otná luohkálanjat leat konstruerejuvvon nu ahte oahppit galget čohkat njuniin ovddasguvlui oahpaheaddji guvlui, visot fokus lea oahpaheaddji alde. Mun jáhkán ahte web 2.0 lea hui buorre molssaeaktu fállat ohppiide somás ja ávkkálaš oahppama. Dat addá jođánis gulahallama oahpaheaddji ja studeantta gaskkas, ja studeanttaid gaskkas. Wesch muitala juste dán maid mun dás dal muitalan. Mun jahkán ahte dát motivere oahppat go lea dakkár heivehuvvon oahpahan vuohki.

Movt dainna galgá bargat? Das leat hui ollu vejolašvuođat ja mun meinen dan dihte ahte lea dehálaš diehtit mainna áigu bargat ja ferte bures plánet dan ovdagihtii. Sáhtán váldit ovtta ovdamearkka das mainna sáhttá bargat ja movt bargat dainna. Jus mun lean oahpaheaddji nuoraidskuvllas ja áiggun oažžut ohppiid čállit ja jurddašit, de sáhttit ráhkadit web stohkosa mas viežžat dilálašvuođaid duohta máilmmis. Dás sáhttet bargat joavkkuin, guovttes ja guovttes, gos de galget čállit “muitalusa” masa bidjet čiegus dieđuid máid nubbi galgá čoavdit. Web 2.0 siskkobeal gávdnojit ollu čállin reaiddut mat leat nuvttá, nugo “google doc’s”.

Movt mii OP2 sáhttit dán geavahit? Okta ovdamearka movt dán sáhttit geavahit lea juste dát maid dál čálan deike, Lasse Wigelius lea addán midjiide sisabuktin barggu mas galgat čállit logga blogga hámis dahje eará hámis. Juste dás geavahan mun blogga čállima ávkin buktit sisa bargguid mat leat geatnegahttojuvvon. Mu mielas lea maiddái hui álkit čállit dákkár hámis go lea hui friddja čállin ja dieđan ahte in dárbbat sisabuktit eará go mu blogga ruovttusiiddu.

Jørn Inge Eira